CEBU, Philippines - Nalandig sa tambalanan ang usa ka menor de edad human dunggaba sa wala mailhing grupo sa mga batan-on sa Barangay Bulacao, Dakbayan sa Talisay kagahapon sa kadlawon.
Ang biktima nailhan nga si Mico Silaya, 16-anyos nga taga Sitio Alegre sa nahisgutang lugar.
Basi sa talaan sa Talisay City Police nasayran nga gikan nagduwa sa internetan ang biktima uban sa higala niini nga ginganlan og Paul. Mga alas 3 sa kadlawon, nagkasabot ang duha nga mamauli.
Samtang naglakaw sila sa karsada, adunay grupo sa mga batan-on nga nakigharong kanila. Nitumaw ang panaglalis hangtud nga niresulta sa pagsinukmagay.
Ang biktima wala makabantay nga aduna’y nilipot sa iyang luyo hinungdan nga nadunggaban kini makaduha ka higayon sa iyang buko-buko.
Human sa hitabo, dali nga nisibat ang mga batan-ong suspetsado samtang gidala si Silaya sa Talisay City District Hospital ug gibalhin sab dayon sa tambalanan sa Siyudad sa Sugbo.
Ang kapolisan nagduda nga aduna’y daan nga panagbangi ang duha ka grupo. Hinoon padayon nilang gipangita ang mga suspek kay nakaila man ang mga biktima sa mga panagway niini. (BANAT NEWS)