CEBU, Philippines - Giawhag sa kagamhanan sa Probinsiya sa Sugbo ang mga doktor, nurses, medical technologist ug uban pang medical practitioners ilabi na kadtong mga bag-ong gradwar ug kadtong mga nagtrabaho sa mga pribadong hospital kinsa nagdawat og gagmay nga sweldo nga moaplay sa Kapitolyo.
Ang hepe sa Provincial Health Office, Dr. Rene Catan, nagkanayon nga ang mga provincial ug district hospitals nagkinahanglan og dugang mga doktor ug uban pang medical practitioners sa mas taas nga sweldo.
Ang med-tech ug nurses nga job order magdawat og P18,000 ngadto sa P20,000 matag buwan isip starting salary.
Matud ni Catan nga duha ka klase sa doktor ang ilang dawaton nga mao ang “hospitalist” ug “retainer”.
Ang hospitalist ang mo-duty sa hospital sulod sa 24 oras samtang ang retainer “on call” kini.
Ang probinsiya motanyag og lateral entry alang sa residency training ngadto sa mga doktor kung gusto kining mag-residency sa umaabot.
Ang probinsiya adunay 16 ka hospitals lakip na ang upat ka provincial hospitals sa Dakbayan sa Carcar, Danao ug Bogo ug Lungsod sa Balamban.
Ang mga provincial hospitals ubos kini sa level 2 category ug nagkinahanglan og 300-400 ka empleyado.
Gibutyag ni Catan nga ang posibleng unang makompleto sa gikinahanglan nga empleyado ang provincial hospital pa sa Dakbayan sa Carcar.
Sa laing bahin, niining ulahi lang ang PHO nakadawat og reklamo gikan sa mga konstituwente sama sa kuwang og mga personnel sa tambalanan ug ang giingong dili maayong pamatasan sa personnel.
Ang probinsiya nagtinguha sa pagpauswag sa ilang medical services ngadto sa katawhan sa kalungsuran ilabi na sa mga kabus.
Sayo niini si Gobernador Hilario Davide III nipadayag nga ang mga indigents libre kini sa mga tambalanan sa probinsiya lakip na ang paggamit nila sa ambulansiya.
Apan dunay isyu nga nitumaw nga dunay mga kabus nga gipabayad sa paggamit nila og ambulansiya ug dunay gipabayad sab sa ilang mga balayranan sa tambalanan. (BANAT NEWS)