CEBU, Philippines - Dili na pabalikon sa pagtukod sa ilang mga panimaye ang 300 ka pamilya nga nasunugan sa Sitio Salvacion, Maguikay, Dakbayan sa Mandaue atol sa pagsugat sa Bag-ong Tuig. Kini ang gipadayag sa tulo ka tag-iya sa luna sa maong dapit ngadto kang Mayor Gabriel Luis “Luigi” Quisumbing.
Hinuon ang mga tag-iya sa luna nipadayag sa paghatag og pinansiyal nga hinabang ngadto sa mga biktima kinsa kasagaran mga informal settlers.
Sukwahi hinoon ang kahimtang sa Sitio Sto. Niño sa Barangay Guizo nga dungan nga naigo sab sa sunog kay ang 30 ka tag-iya sa luna nga gipuy-an sa mga biktima ang nitugot nga makabalik pagtukod sa ilang panimaye ang mga biktima.
Apan matud ni Quisumbing nga gusto sa mga tag-iya sa luna nga ma-reblock aron kabutangan og access road alang sa emerhensiya sanglit kaduha na naigo sa sunog ang maong lugar.
Nasayran gikan sa City Social Welfare Office nga ilang natala ang 275 ka pamilya nga naapektuhan sa sunog sa maong dapit diin kadaghanan pulos nag-abang.
Apan giklaro ni Quisumbing nga technical assistance lang ang mahatag sa siyudad ug dili na sila kahatag sa heavy equipment ug semento alang sa himoong reblocking.
Ang konseho sa siyudad nideklarar na ubos sa state of calamity sa duha ka barangay diin nahitabo ang sunog aron madali ang pagproseso sa calamity fund gikan sa panudlanan sa kagamhanan. (BANAT NEWS)