CEBU, Philippines - Sukad sa 2006 niabot na sa 80 ka suspek sa human trafficking ang nakonbikto sa Metro Cebu diin 29 niini niadto lang 2015, matud ni Atty. Samson Inocencio, Jr., national director sa International Justice Mission (IJM).
Si Inocencio nibutyag nga kasamtangan ang IJM nisuporta sa pagpasaka sa 60 ka kaso ngadto sa korte ug nanghinaut nga makonbikto ang mga akusado. Matud niya nga dunay mga langyaw sa mga akusado apan kasagaran mga lokal.
Ang mga biktima sa human trafficking kasagaran kanila ang naa pa karon sa shelter ilabi na ang mga minor de edad.
Matud ni Inocencio nga ang Department of Social Welfare and Development (DSWD) ug ubang mga pribadong institusyon maoy nag-atiman alang sa restoration process sa mga biktima ug nihatag sa mga gikinahanglan nilang serbisyo.
Ubang biktima gibalik na ngadto sa komunidad, uban duna nay nibalik sa pag-eskwela ug dunay nakatapos na sa pagtungha sa kolehiyo ug nagtrabaho na.
Gawas sa pakigtinabangay sa mga prosecutors ug kapolisan, ang IJM nakigtinabangay sab sa DSWD ug mga pribadong institusyon sa paghatag og after care sa mga biktima. (BANAT NEWS)