CEBU, Philippines - Gidakop sa Mactan-Cebu International Airport niadtong Miyerkules sa hapon ang bayaw ni Cebu City Councilor Eduardo Rama Jr. gumikan sa pagdala og dos gramos nga marijuana.
Ang gidakop mao si Joseph Chiongbian, 30-anyos, igsuon sa asawa ni Rama.
Si Police Senior Superintendent Ritchie Posadas, hepe sa Aviation Security Unit-7, nagkanayon nga duha ka security screening officers sa Office for Transportation Security ang nakakita pinaagi sa X-ray nga dunay gidala nga marijuana si Chiongbian.
Padulong unta sa Davao si Chiongbian niadtong adlawa apan gi-hold sa opisina sa AVSEU ug kagahapon sa buntag gipasakaan kini og kasong kalapasan sa Republic Act 9165 kon ang Comprehensive Dangerous Drugs Act of 2002.
Matud ni Assistant City Prosecutor Ruzo Zaragoza sa Lapu-Lapu City Hall of Justice nga makapiyansa ra ang suspek sa kantidad nga P200,000. Nisuway sa pagkuha og habig ang Banat News sa suspek apan nagdumili kini. (BANAT NEWS)