CEBU, Philippines - Cebu Archbishop Jose Palma nipasabot sa apostolic letter ni Pope Francis nga nagmando sa tanang kaparian nga mopakumpisal sa kababayen-an nga nagpakuha sa ilang gisabak.
Gipadayag sa arsobispo ang unod sa 17 ka pahina nga kamanduan sa Santo Papa diin matud niini nga ang Dios maloloy-on ug mahigugmaon mao nga kinahanglan kaayo ang sakramento sa kumpisal. Dugang niini nga atol sa pagpakumpisal ug pagpasaylo sa mga nakahimo sa sala kinahanglan nga pahibaw-on sila kun unsa ka daku ang ilang sala ug kinahanglan nga dili na kini nila usbon.
Bisan sa kadaku sa sala sa tawo kun kini mahinulsolon, andam ang Ginoo nga mopasaylo. Gibutyag ni Palma nga subay sa maong pastoral letter, sila sa artsidyosesis mopadala og circular letter sa tanang simbahan sa Sugbo.
Si Dr. Rene Josef Bullecer sa Council of the Laity niingon nga nakurat siya sa maong kamanduan kay ang pagpakuha dili usa ka yano nga sala ug bugtong obispo ug pipila lang ka pari ang gihatagan niini og kamanduan nga mohatag og absolution.
Iyang gitataw nga maayo ang laraw sa Santo Papa kay nasabtan niini ang realidad nga daghan na ang nidangop sa pagpakuha sa ilang mga gimabdos, apan kinahanglan kini og sakto nga guidelines kay basin mahimo kining rason nga daghan ang magpakuha. (BANAT NEWS)