CEBU, Philippines - Hepe sa Albuera Police Station Chief Inspector Jovie Espenido nabalaka karon sa iyang seguridad human napatay si Mayor Rolando Espinosa Sr. sulod sa prisohan sa Leyte Sub Provincial Jail sa Baybay City Leyte niadtong adlaw nga Sabado, apan iya na lang gihangad tanan sa Ginoo.
Matud pa ni Espenido, human niya napasaka ang daghan nga mga kaso sa mga tawo nga tigdawatan og payola gikan sa mga Espinosa, dili na maihap ang mga hulga sa kinabuhi nga iyang nadawat,
Apan wala niya hatagi og gibug-aton tungod kay dili na siya makapadayon sa iyang gimbuhaton kun magpasulabi iyang kahadlok apan sila sa ilang pamilya kanunay nag-ampo. Dili siya motoo nga misukol ang mayor. Gikwestyon usab niya nganong nawagtang man ang mga hard drives sa CCTV sa prisohan, ang CIDG-8 mihimakak nga silay nagkuha niini.
Matud niya ang nahitabo ni Espinosa ug sa laing inmate klaro nga usa ka extra-judicial killings.
Tungod sa nahitabo, daw kaduhaduhaan kun kinsa gyud ang tinuod nga nitabang sa kampanya ni Presidente Rodrigo Duterte matud pa niya.
Gitug-an ni Espenido, nabalaka siya sa higayon nga moabot si Kerwin Espinosa ang anak sa mayor nga gitumbok mismo sa namatay nga kini maoy nagpadagan sa illegal drug trade sa Eastern Visayas.
Nabalaka si Espenido basin mapagan siya sa gitawag nga “duwa sa mga heneral.”
Kahinumdoman nga aduna nay mga pipila ka heneral sa kapolisan ang gilambigitan sa illegal drug trade nga gipangalanan ni Duterte. (/EIM) (BANAT NEWS)