CEBU, Philippines - Patay na nga nadangat sa Cebu City Medical Center (CCMC) ang 59-anyos nga babaye human gidunggab pito ka higayon sa iyang silingan nga lalaki kinsa nipalit sa away sa iyang kapuyo sa Aranas Extension, Duljo Fatima, Dakbayan sa Sugbo pasado alas 6 sa nakalabay nga gabii.
Ang biktima giila nga si Yolanda Cataytay, minyo ug nagpuyo sa maong dapit, samtang ang suspek nailhan nga si Ritche Caburnay, 21-anyos.
Si Police Officer 3 Cristobal Geronimo nga nahinabi sa Banat News niingon nga dihang naabot sa ilang gipuy-an si Caburnay, nideretso kini og adto sa balay sa biktima ug nikomprontasi sa nahitabong lalis niini sa iyang kapuyo.
Human sa ilang lalis kalit lang nibunot og kutsilyo ang suspek ug dayon hansak sa makadaghan nga higayon sa lawas ug ulo sa biktima.
Human sa hitabo nakapangayo pa og tabang sa iyang bana ang biktima ug suway pa unta kini nga gidala sa tambalanan apan nakabsan gyud kini sa gininhawa.
Ang suspek dali sab nga nisibat sa maong dapit.
Si Geronimo niingon nga kung basehan ang samad dinunggaban sa biktima klaro kaayo nga grabe ang gibati nga kasuko sa suspek gumikan kay sagad sa mga samad sa biktima gikan man sa mga delikadong bahin sa lawas. (BANAT NEWS)