CEBU, Philippines - Ang hunta probinsiyal niawhag sa tanang kalungsuran ug siyudad sa lalawigan nga mogama, mag-update ug mag-implementar sa ilang sewerage ug septage sanitation program subay sa pagtuman sa Clean Water Act of 2004.
Si Bokal Thadeo Jovito Ouano nagkanayon nga ang hunta probinsiyal nipalabang kaniadto sa resolusyon nga nag-awhag sa tanang mayor sa lalawigan nga mag-establisar og septage management program alang sa proper collection ug disposal sa septage gikan sa mga septic tank sa kabalayan ug establisamento sa ilang hurisdiksiyon pinaagi sa paggama og kaugalingon nga septage treatment plant o mokontrata og pribado kinsa adunay accredited septage plant.
Sa water sampling point sa Department of Environment and Natural Resources sa underground water o pusu, kasapaan ug coastal environment, nasuta nga ang pollution level niini misobra sa normal standard. Matud ni Ouano nga aduna nay mga water-borne disease nga nitumaw diin nakaapekto kini sa panglawas sa mga Sugbuanon.
Niining ulahi lang, ang probinsiya nideklara og dengue outbreak tungod sa kadaghanan nga naapektohan sa maong sakit.
Ang sewerage maoy kasagarang itlogan sa mga lamok ug kinahanglan nga hatagan kini sa pagtagad aron masumpo ang mga lamok. Si Ouano nagkanayon nga obligasyon sa gobiyerno ang pagpreserba sa panglawas sa katawhan pinaagi sa paggama og lakang batok sa polusyon ug paggama og sanitary protection sa surface ug ground water.
Gitumbok ni Ouano ang Section 8 sa Clean Water Act nga mao ang implementing rules and regulation diin ang mga lokal nga kagamhanan mogama og mga guidelines ug standards alang sa pagkolekta, treatment ug disposal sa sewage lakip na ang mga guidelines alang sa mga establisamento ug operasyon sa centralized sewage treatment system. (BANAT NEWS)