CEBU, Philippines - Tinguha ni Talisay City Mayor Eduardo Gullas ang pagpatuman sa comprehensive drainage master plan sa tibuok siyudad.
Kini human daghan sa mga lugar sa Talisay ang makasinati gyud og pagbaha matag adunay uwan tungod sa ka gamay sa mga drainages.
Matud ni Gullas nga ang laraw maoy nag-una sa listahan sa iyang giandam nga 2017 budget.
Siya nagkanayon nga ang mga infrastructure projects maoy nag-una nga ipatuman sa iyang administrasyon sa umaabot pang katuigan.
Ang drainage master plan nahimoan na og pagtuon sa panahon ni kanhi mayor ug karon Konsehal Socrates Fernandez.
Apan iyang gipasabot nga wala makairog ang plano tungod kay wala kini napatuman sa niagi pang administrasyon.
Iyang gihulagway nga kung nahinay-hinayan kini sa pagpatuman kaniadto hayan dili unta makasinati og pagbaha ang dakbayan nga taud-taud na nga problema panahon sa ting-uwan.
Si Gullas moduso sa iyang annual budget nga gibanabana nga moabot sa P900 milyones ngadto sa konseho sa dili pa ang Oktubre 15. (BANAT NEWS)