CEBU, Philippines - Ipangapod-apod ugma sa kagamhanan sa Siyudad sa Sugbo ang financial assistance sa mga senior citizens.
Gibutyag ni Domingo Chavez, pangulo sa Office of the Senior Citizen’s Affairs sa siyudad, nga magsugod ang pagpanghatag sa alas 8 sa buntag hangtud na sa alas 12 sa udto.
Mao kini ang ika-pitong hugna sa pagpanghatag sa financial assistance diin naa na sa P9,000 ang nahatag ug P3,000 na lang ang kuwang sanglit sa kinatibuk-an ang mga senior citizens makadawat og P12,000 sulod sa usa ka tuig.
Sigun ni Chavez nga moabot sa 67,300 ka senior citizens ang mahatagan karong Domingo.
Niadtong Agosto gipangapod-apod ang tag P2,000 sa mga senior citizens apan nakasugat og mga problema ug reklamo.
Tun-an pa sa OSCA ang ilang plano nga ipaagi sa automated teller machine (ATM) ang paghatag sa hinabang basin og mawagtang usab sa tag-iya ang card.
Ang dili makakuha atol sa adlaw sa pagpanghatag hatagan og 10 ka adlaw aron makakuha pa sa City Hall apan kung pakyas lang gihapon dili na nila kini makuha. (BANAT NEWS)