CEBU, Philippines - Gisusi karon sa kapulisan ang nanggawas nga reports nga wala na sa nasud si Cebu businessman Peter Lim, giingong may kalambigitan sa ilegal nga druga.
Si Chief Superintendent Noli Taliño, regional director sa Police Regional Office-7 nagkanayon nga gisusi na sa iyang mga tawo ang maong report ug wala pa siyay feedback nga nadawat.
Apan si Lim pinaagi sa iyang abogado nga si Ramos Esguerra mihimakak sa maong reports. Iyang giklaro nga si Lim ug ang iyang pamilya nia ra sa Cebu City.
Matud ni Esguerra nga sukad nagsugod ang imbestigasyon sa National Bureau of Investigation niadtong Hulyo 21, 2006 nagpabilin ra siya sa nasud aron mokooperar sa gihimong imbestigasyon.
Dugang pa ni Esguerra nga si Lim walay intensyon nga mogawas sa nasud ug nagmalaumon nga malimpyo ang iyang pangalan sa mga akusasyon nga gibato kaniya.
Si Taliño nagkanayon nga ang pag-validate sa maong report usa ka inisyatiba nga ilang gihimo bisan og walay kamandoan gikan sa Camp Crame tungod kay usa man si Lim sa mga gipangalanan ni Pres. Duterte nga giingong nalambigit sa illegal drug trade sa nasud.
Ning bag-ohay pa lang gipasanginlan si Lim nga mao ang nagsuplay sa shabu sa gipasanginlang notadong drug lord sa Leyte nga si Roland “Kerwin” Espinosa anak ni Albuera, Leyte Mayor Rolando Espinosa Sr. kinsa gitumbok usab ni Duterte nga drug protector ni Kerwin. Si Mayor Espinosa kusganong nihimakak sa pasangil apan miangkon kini nga nalambigit sa drugas iyang anak.
Ang hepe sa kapolisan sa Albuera nga si Chief Inspector Jovie Espenido mitumbok kang Lim nga maoy magkuhaan og ilegal nga drugas gikan sa China samtang si Kerwin maoy mangapud-apod niini sa Bohol, Eastern Visayas ug Ozamiz City.
Ang kampo ni Lim nihimakak usab sa bag-ong pasangil kay matud pa wala kini makaila sa mga Espinosa. (BANAT NEWS)