CEBU, Philippines - Nagtuo si Lapu-Lapu City Mayor Paz Radaza nga dili mawani ang ubang pangpublikong transportasyon kung ipatuman ang light rail transit (LRT) system sa Sugbo ug ubang bahin sa nasud.
Kini gumikan kay sa mga major roads lang ibutang ang LRT system.
“But of course this does not mean nga mawala ang uban nga mga sakyanan,” matud ni Radaza.
Nagtuo usab si Radaza nga dili makamugna og trapik ang proyekto apan kinahanglan kini nga tun-an.
Kini gidasunan usab ni Engr. Nigel Paul Villarete, ang general manager sa Mactan-Cebu International Airport Authority aron pagsuta kung “economically viable” ba ang proyekto o dili.
Ang LRT system maoy usa sa mga plano ni Presidente Rodrigo Duterte.
Sa iyang bahin, suportado ni Kongresista Gerald Anthony “Samsam” Gullas sa unang distrito sa Probinsiya sa Sugbo ang plano ni Duterte.
Si Gullas nagtuo nga mapatuman gyud ang dugay na niyang giduso sa Kongreso aron matubag ang problema sa trapik sa Metro Cebu.
Matud ni Gullas nga ang paghatag og emergency power kang Duterte makatabang kini sa paspas nga pagsulbad sa problema.
Dili magduha-duha si Gullas sa pag-uyon sa plano nga hatagan si Duterte og emergency power.
Hinoon matud ni Gullas nga nipasalig kaniya si Presidential Assistant for the Visayas Michael Diño nga bisan dili na siya moduso og balaudnon, ang LRT mapatuman gyud sa dili madugay.
Dugang pa niya nga niabot na ang Singapore-based firm nga mohimo og survey sa plano. (BANAT NEWS)