CEBU, Philippines - Gihulagway ni Presidential Communications Secretary Martin Andanar nga makapalimbawot-balhibo ug makapamata sa mga Pilipino ang labing una nga State of the Nation Address (SONA) ni Presidente Rodrigo Roa Duterte karong adlawa.
Matud pa sa Interaksyon.Com, nakahilak siya dihang una niyang gibasa ang unang draft sa diskurso niadtong Sabado sa gabii sa dihang iyang gi-review ang ipamulong ni Presidente Duterte uban ang mga luyo-luyo niini ug ang RTVM.
Giingong kapin sa ka-napulo nila giusab ang maong pamulong nga personal nga gisuwat ni Duterte.
"The address of the President, personally written by the President, will be a very powerful speech that will awaken the patriot in every Filipino. When I read the speech - and I don't want to exaggerate - but the first time I read the speech, it made me cry. Ganun po kaganda… makabagbag damdamin ang speech ng Pangulo natin," asoy pa ni Andanar.
Giingon nga matapos kini sulod sa 38 minutos ug mahimong motaas pa kini depende sa mga pakpak ug ad lib nga himuon sa Presidente.
FOI
Laing gipahibawo ni Andanar mao nga atol sa preparasyon sa SONA, gipirmahan usab ni Duterte ang executive order nga nagpatuman sa Freedom of Information in the Executive branch.
Kini samtang nag-ung-ong pa sa Kongreso ang mas lapad nga FOI Bill nga giyak-an lang sa milabay nga administrasyon.
Ang FOI maoy usa ka pamaagi aron makaukay ang publiko sa mga transaksyon sa gobiyerno nga usa usab ka pamaagi nga mapugngan ang kurapsyon.
Si incoming Senate President Aquilino "Koko" Pimentel III sa mao gihapong report miingon nga makapabilib ang gihimo ni Duterte.
Giingong ang Executive branch adunay daghang impormasyon diin matud pa ni Pimentel, anaa kini sa 60 ngadto sa 70 porsiyento sa kinatibuk-ang gigunitang impormasyon sa gobiyerno nga angay mahibaw-an sa katawhan. Ang FOI Bill napasar na sa ikatulong pagbasa sa 16th Senate apan natanggong sa Ubos Balay-Balauranon.
Sa press briefing ni Andanar kagahapon sa buntag, daghang reporters ang nangutana kun ang “transparency” nga gisaad sa FOI EO makapawagtang na ba sa personal nga palisiya sa presidente nga dili magpa-interview sa media.
Apan matud ni Andanar, nga ang FOI maoy sulbad sa pagdumili pagpa-interview ni Duterte kay buot hunahunaon, ang presidente adunay 30 ka miyembro sa gabinete nga mahimong makatubag sa mga pangutana kabahin sa mga gibuhat sa gobiyerno.
Nasayran nga wala na magpa-interview si Duterte, sukad sa gibuhian niya nga mga pamahayag batok sa media sa wala pa kini hingpit nga milingkod niadtong Hunyo 30.
Ang EO ni Duterte matud pa ni Andanar adunay mga probisyon nga naglimita sa FOI sa Executive branch. Sama sa Section 4, nag-ingon nga kun adunay impormasyon nga mahulog ubos sa bisan unsa nga walay labot sa gilatid sa konstitusyon, anaa sa balaud ug jurisprudence, wala kini labot sa maong EO.
Dinhi sa Sugbo, si Archbishop Jose Palma malaumon nga magpadayon ang saad sa bag-ong administrasyon nga patas ang balaod ug walay pagpihigpihig sa pagpatuman niini.
Malaumon siya nga sinsero sa pagserbisyo sa katawhan ug dili lang alang sa ilang kaugalingon nga kaayohan ang himuon sa mga naa karon sa katungdanan.
Malaumon usab siya nga manawagan ang presidente og panaghiusa ug pagtinabangay sa tanan alang sa hingpit nga kausaban alang sa kaayohan sa katawhan.
Gitug-an niini nga atol sa ilang tigum sa Catholic Bishops Conference of the Philippines, ilang natuki nga dili na lang mopagawas og hiniusang mensahe alang sa Presidente kay posibleng malahi ang interpretasyon niini, hinungdan nga nadesideran nila nga bisitahon na lang si Duterte sa iyang buhatan sama sa gibuhat ni Archbishop Emeritus Ricardo Cardinal Vidal. (BANAT NEWS)