CEBU, Philippines - Sa 1,600 ka empleyado sa Kapitolyo, usa ra ang wala kapasar sa evaluation o performance rating.
Gibutyag ni Ethel Natera, tigpamaba sa Kapitolyo, nga ang maong empleyado gikan sa mga tambalanan sa probinsiya kinsa nahatagan og unsatisfactory rating.
Tungod niini ang maong empleyado wala kadawat sa iyang bonus o 14th-month pay nga sibo sa usa ka buwan nga sweldo.
Si Natera nagkanayon nga sa guidelines nga gihatag sa Civil Service Commission, kung duha ka higayon mahagbong sa Individual Performance Commitment Review ang usa ka empleyado, mamahimo na kining matangtang sa trabaho, regular man o casual.
Ang giduso nga evaluation o performance rating sa mga empleyado maoy ilang performace sa niaging tuig gikan Hunyo hangtud Disyembre.
Pahimangno sa tigpamaba sa Kapitolyo sa mga empleyado nga angay magbag-o sa mga sayop nga binuhatan ug gikutlo ang bahad ni Gobernador Hilario Davide III nga kun dili mausab ang sayop nga binuhatan mas maayo kun magbag-o na og trabahoan. (BANAT NEWS)