CEBU, Philippines - Nakapiyansa na ug napirmahan na sa korte ang release order ni SPO1 Adonis Dumpit alang sa iyang temporaryong kagawasan, apan wala kini mabuhii tungod kay ang Bureau of Corrections pa sa kaulohan maoy mopagawas og order aron kini makagawas.
Sumala pa sa iyang abogado nga si Benjamin Militar napirmahan na ni Judge Carlos Argueles ang release order ni Dumpit human nakabayad na og P250 mil nga piyansa.
Si Dumpit nga nakahinabi sa Banat News naglaom unta nga makagawas na kagahapon human napagawas sa RTC Branch 10 sa Abuyog, Leyte ang iyang release order.
Apan ang mga opisyal sa Leyte Regional Prison nga nagdumili sa pagpaila miingon nga wala pay kamandoan gikan sa kaulohan nga pagawson si Dumpit.
Kahinumdoman nga ang Court of Appeals 20th Division mitugot sa petisyon ni Dumpit nga makapiyansa samtang paminawon ang apelar niya sa kaso nga nagkombikto kaniya sa kasong homicide tungod sa kamatayon sa gipasanginlang tulisan nga si Ronron Go. (BANAT NEWS)