CEBU, Philippines - Gidakop sa kapolisan ang inahan, anak ug laing duha ka lalaki sa managlahi’ng buy-bust operation sa Dakbayan sa Lapu-Lapu sulod sa duha ka adlaw.
Una’ng nasikop sa kapolisan sila’ng Kent Yves Blanco, 21, ug Julius Bacunawa, 20, sa Sitio Parola-MCIAA, Barangay Ibo, sa alas 7:45 sa gabii sa niagi’ng Miyerkules.
Matud ni Police Senior Inspector Mark Gifter Sucalit, hepe sa Lapu-Lapu City Police Office –City Intelligence Branch, nga nakuhaan ang duha ka suspek og 35 ka gagmay’ng putos sa gituohang shabu nga gibana-bana’ng mokantidad og P17,000 ug laing P600 nga halin sa ilegal nga negosyo.
Nasikop sab sa kapolisan si Adela Bancale, 46, ug lalaki’ng anak niini nga si Dexter Bancale, 21, sulod sa ila’ng balay sa Barangay Mactan alas 4:30 sa hapon sa Huwebes.
Matud ni Police Chief Inspector Conrado Manatad, hepe sa Mactan Police Station 2, nga 302 ka gagmay’ng putos sa ilegal nga drugas nga mokantidad og P60,400 ang nasakmit gikan nila’ng Adela ug Dexter lakip na ang P400 nga halin sa pagmaligya og shabu. Nasayran nga si Adela mao’y mangompra sa shabu samtang ang anak niini ang tigputos ug tigtunga sa gipamalit sa inahan.
Nasakmit sa kapolisan ang mga assorted drug paraphernalia sa duha ka operasyon.
Pulos nag-atubang ang upat ka suspek og kaso ubos sa Republic Act 9165 kon ang Comprehensive Dangerous Drugs Acts of 2002 ug pulos nabalhug sa LCPO-detention cell. (BANAT NEWS)