CEBU, Philippines - Gitinguha sa kagamhanan sa Dakbayan sa Mandaue ang pagbutang og lahi nga dalan sa mga delivery vans isip pagsulbad sa suliran sa trapiko.
Si Arch. Florentino Nimor, executive director sa Traffic Enforcement Agency of Mandaue (TEAM), sa iya’ng pamahayag niingon nga ila’ng gitan-aw ang dalan S. Osmeña sa Dakbayan sa Sugbo, Ouano Avenue, dalan A. Soriano ug dalan Plaridel lahos sa Cansaga Bridge ug Dakbayan sa Lapu-Lapu.
Gipasabot ni Nimor nga ila’ng naobserbahan nga human sa oras sa truck ban, masinati na usab ang paghuot sa mga sakyanan.
Gitataw ni Nimor nga ang lahi nga dalan sa mga delivery trucks magamit bisan sa oras sa truck ban.
Kung masuta nga epektibo ang paagi, hayan ila’ng hunungon sa pagpatuman ang truck ban.
Dugang ni Nimor nga epektibo hinuon ang truck ban sanglit napaluag man ang dalan sa peak hours kay wala man magdagan ang dagku nga mga sakyanan.
Giangkon ni Nimor nga ang truck ban dili gyud igo nga pagsulbad sa paghuot sa mga sakyanan sa kadalanan sa Dakbayan sa Mandaue. (BANAT NEWS)