CEBU, Philippines - Giawhag ni Cebu City Acting Mayor Edgardo Labella ang kadagkoan sa White Gold Inc. nga kuhaon ang mga gabok na nga haligi sa giabandonar nilang building duol sa CIT University sa Barangay Labangon.
Gipadad-an ni Labella og suwat ang opisyal sa White Gold nga si Mary Ann Cabahug ug gisukip niini ang suwat-reklamo sa CIT-University nga nabalaka sa kadelikado nga matumba ang ilang mga haligi.
Ang White Gold Inc. maghimo unta og dakong tindahan diha sa tupad sa CIT University apan wala nila gipadayon. Ang mga puthaw nga haligi gipangtaya na ug ang mga semento nga haligi katumbahon na.
Nabalaka ang tagdumala sa CIT University nga makahatag og risgo sa ilang mga tinun-an ang maong mga gabok na nga haligi mao nga mipadala sila’g suwat sa City Hall aron mangayo’g tabang.
Si Engr. Jennifer Sering sa Office of the Building Officials (OBO) mihimo’g inspection sa maong dapit ug iyang napamatud-an nga delikado na ang maong mga haligi.
Si Cabahug mitataw nga gisugdan na nila ang pagpanguha sa mga haligi aron dili na makahatag og peligro sa kabataan. Ang maong dapit kaniadto gireklamo usab sa mga opisyal sa Barangay Labangon.
Ang maong lugar magpundo ang tubig kun adunay kusog nga uwan ug dugay kaayong mohubas hinungdan nga gituohang itlogan ra sa mga lamok ang maglim-aw nga tubig. (BANAT NEWS)