CEBU, Philippines - Gibasura sa Malacañang ang motion for reconsideration nga giduso sa Commission on Higher Education (CHED) ug sa Southwestern University -Matias H. Aznar Memorial College of Medicine (MHAM).
Kini ang ikaduha’ng kamanduan sa Malacañang sa pagdili sa CHED sa pagpahunong sa operasyon sa medical school sa Southwestern University Inc. (SWUI).
Sayo niini wala ilha sa CHED ang college of medicine sa SWUI ug gipaburan niini ang SWU-MHAM.
Gumikan niini, matud ni Dr. Chito Salazar, chairman of the board ug president sa SWUI, nga apektado ang ila’ng mga gradwado ilabi na ang mga langyaw sanglit dili sila hatagan og special order ug certificate of eligibility.
Niadto’ng Abril sa niaging tuig, adunay 23 nga nigradwar sa SWUI ang wala hatagi og SO sa CHED samtang 60 ka langyaw ang wala hatagi og certificate of eligibility.
Gikabalak-an ni Salazar nga hayan mao usab ang mahitabo sa 40 nila ka tinun-an nga mogradwar karong tuiga.
Sa giluwatang desisyon sa Office of the President nga gipirmahan ni Atty. Menardo Guevarra, Deputy Executive Secretary for Legal Affairs, kini nimando sa CHED sa dili una pagpatuman sa resolusyon niadto’ng Hunyo 9, 2014 ug Disyembre 17-18 sa sama’ng tuig aron dili makompromiso ug maapektuhan ang mga tinun-an.
Kung mapakyas ang CHED, ang Office of the President nibahad nga mopahamtang og silot sa ahensiya.
Nagplano usab ang mga tinun-an sa SWUI-College of Medicine nga mopasaka og kaso batok kang CHED-7 Director Freddie Bernal ug uban pa’ng opisyales tungod sa padayong pagpiit sa mga tinun-an.
Ang mga tinun-an ang napiit sa bangi sa pamilya’ng Aznar nga nanag-iya sa tunghaan diha’ng ang PHINMA ang nidumala ug natukod ang bag-ong campus sa SWU-MHAM niadto’ng 2014. (BANAT NEWS)