CEBU, Philippines – Hapsay ug malinawon ang pagbukas sa Santos nga Misa sa 51st International Eucharistic Congress (IEC) diha sa Plaza Independencia sa Dakbayan sa Sugbo kagahapon sa hapon.
Managlahi hinuon ang pagbanabana sa kapolisan sa gidaghanon sa mga tawong nanambong.
Ang hepe sa kapulisan sa Waterfront Police Station, Chief Insp. Jose Gesto mibanabana human sa iyang paglibot nga miabot og 400 mil ka tawo ang nagdugok sa venue, samtang si Chief Supt. Manuel Gaerlan nga nakahinabi sa mga tigbalita kagahapon mibana-bana nga mokabat 350 mil ang nanambong.
Apan 150 mil lamang, nga mas gamay sa pagbanabana sa ground commander nga si Supt. Artemio Ricabo base sa gibutyag sa hepe sa Police Community Relation sa Cebu City Police Office nga si Chief Insp. David Señor nganhi sa Banat News.
Hinuon, bisan sa dili magkaparehas nila nga pagbanabana sa gidaghanon sa mga tawong nitambong, hapsay ug hangtud ning pagsuwat sa balita pasado alas-7 way natala sa police blotter sa Waterfront Police Station bisan usa ka krimen sama sa pagpanguot.
Ang kapulisan sa CCPO mipakatap usab og 387 ka mga unipormadong pulis, wala pay labot sa daghang force multipliers nga gipakatap sa nagkadaiyang buhatan nga miabag sa seguridad sa maong kalihokan.
Gipasabot ni Señor nga matag kalihokan sa IEC dunay igo’ng pwersa sa kapulisan ang ilang gi-andam aron motambong aron usab makapahuway ang uban nga pulis nga gigamit sa uban nga aktibidad.
Dako usab ang pagtuo ni Señor nga posibleng ang pagkasikop sa grupo sa mga mangunguot sa mga sakop sa Theft and Robbery Section (TRS) sa CCPO niadtong Sinulog, mao nga wala’y nabiktima kagahapong adlawa.
Sa laing bahin, hingpit na nga nakapangandam ang buhatan sa trapiko sa Dakbayan sa Mandaue ug Dakbayan sa Lapu-Lapu sa pagahimoon nga Pilgrim Walk sa mokabat 5,000 ka mga batan-on nga kabahin sa mga kalihokan sa 51st IEC.
Nunot niining maong kalihokan si Glen Antigua nga operation chief sa Traffic Enforcement Agency of Mandaue (TEAM) miluwat na karon og traffic advisory alang sa mga motorista.
Ang mga sakyanan nga padulong sa Dakbayan sa Lapu-Lapu adto mosubay sa dalan A.C. Cortes Avenue adto moliko sa dalan Sotero B. Cabahug ug moliko sa eskina Plaridel ug molahos na ngadto sa UN Avenue sa pagsubay sa Marcelo Fernan Bridge.
Samtang ang pangulo sa City Traffic Management System nga si Frank Brazil miingon siradohan ang dalan M.L. Quezon sa Barangay Pajo sa Dakbayan sa Lapu-Lapu sa higayon nga molabay na ang mga kabataan.
Anha mosubay sa usa ka lane sa Mandaue-Mactan Bridge ang mga batan-on gikan sa Lapu-Lapu ug molahos sa dalan A.C. Cortes Avenue, moliko sa dalan Plaridel ug mopaingon sa dalan A. Soriano Avenue ug lahos sa Mandane Bay sa reclamation area diin himuon ang kalihokan. – /EIM) (BANAT NEWS)