CEBU, Philippines - Nabulabog ang birthday party human ang mga bisitang uyuan ug pag-umangkon nag-away ug nisangpot sa pagpamusil niadtong miaging adlaw diha sa Sitio Riverside, Brgy. Lawaan 3, Dakbayan sa Talisay.
Ang biktima mao si Jerry Llanto, 29, nagpuyo sa nahisgutang lugar, samtang ang suspetsado nga nasikop human sa hot pursuit operation mao ang iyang uyoan nga si Ranulfo Llanto, 42.
Matud pa ni Police Officer 3 Ferdinand Pablo sa Talisay City Police Station parehong imbitado ang duha sa birthday party sa ilang silingan ug nag-uban sa pag-inom apan nagkabingkil ang duha ug nagsininghagay.
Base sa gitug-an sa ubang mga bisita, ang biktima ang nagpunay og hata og dunggab ngadto sa suspek ug dihadiha niibot og giluklok nga pistola ang suspek ug gipusil ang biktima diha sa walang bahin sa lawas.
Daling nisibat ang suspek apan nadakpan kini pagkabuntag diha sa iyang balay ug nakuha ang .9mm pistol nga adunay lima ka bala. Ang biktima gidala sa Don Vicente Sotto Memorial Medical Center. (BANAT NEWS)