CEBU, Philippines - Patay diha-diha ang drayber sa motorsiklo nga nisampak sa usa ka dump truck nga paingon magpa-gasolina sa national highway sa Aliwanay, Balamban pasado alas 5 sa nakalabay nga hapon.
Ang drayber sa motorsiklo mao si Lee Michael Cuizon, 36, taga Dakbayan sa Mandaue, samtang ang drayber sa dump truck mao si Andy Vasquez, 45, lumad nga taga Dakbayan sa Danao.
Nalandig sa tambalanan ang backrider sa motorsiklo nga si William Pulido, 19, kinsa nakaangkon og angol sa ulo.
Matud ni Police Officer 3 Yuri Colonia, desk officer sa Balamban Police Station, nga nagbabag sa karsada ang dump truck kay paingon moatras padulong sa gasolinahan aron magpatubil.
Tayming nga naghaguros nga nagdagan ang motorsiklo ug wala na nakakontrol ang drayber hangtud nisampak dapit sa unahan sa dump truck.
Gumikan sa ka kusog sa bangga, mga bali sa nagkadaiyang bahin sa lawas ug grabe’ng bun-og sa ulo ang naangkon sa drayber hinungdan nga kini nakabsan sa kinabuhi.
Gitug-an ni Colonia nga nakagawas ra usab sa prisohan ang drayber sa dump truck human nakigsabot ug nagka-areglohay sa pamilya sa namatay. (BANAT NEWS)