CEBU, Philippines – Nipasidaan na karon ang hepe sa Theft and Robbery Section sa Cebu City Police Office sa publiko nga magmabinantayon human sila nakakuha og mga taho nga aduna na’y nangabot nga grupo sa mga dayo nga mangunguot.
Matud ni Senior Inspector Rolito Supatan, hepe sa TRS, nga unom ka grupo ug mga ilado nga mangawatay sa Davao ang matud pa niabot sa Sugbo sa niagi’ng adlaw.
Posible’ng target sa grupo ang umaabot Sinulog diin daghang tawo nga magdasok.
Si Supatan niingon nga mao kini karon ang ila’ng gisubay aron masikop kung may mabiktima.
Nakig-alayon na sila karon sa mga tag-iya og mga lodging houses sa dakbayan nga mao’y sagad puy-an sa mga dayo nga grupo sa kawatan.
Sigun niya nga kini’ng grupoha motira og bisan unsa nga klase sa pagpangawat sama sa pagpanguot, salisi ug tiyempo modus operandi.
Nipasidaan si Supatan sa publiko nga moapil sa mga kalihukan sa Sinulog nga magmabinantayon ug dili lang magdala og daghan nga mahalon nga mga butang aron dili matintal ang mga kawatan. (Ma. Fatima R. Secuya/GMR)(BANAT NEWS)