CEBU, Philippines – Gitinguha sa Mandaue City Police Office ang pagmugna og local task force alang sa seguridad sa kalihukan sa International Eucharistic Congress.
Si Chief Inspector Jimmy Aguisanda sa MCPO niingon nga sila sa kapolisan ang abagan sa nagkadaiya’ng ahensiya sa kagamhanan alang sa pagpatuman sa kahapsay ug kalinaw.
Motabang usab ang kapin sa 100 ka police interns gikan sa nagkadaiyang unibersidad sa dakbayan ingon man ang mga barangay tanod sa 27 ka barangay.
Naglakip sa mga kalihukan sa IEC nga pagahimuon sa dakbayan mao ang IEC Theological Symposium sa Enero 20 hangtud 22 sa Cebu Doctors University sa North Reclamation Area, 112th Catholic Bishops Conference of the Philippines (CBCP) sa Oakridge Pavilion sa Banilad, Youth Day sa Enero 29 hangtud 30 sa Mandani Bay sa NRA ug Parish Encounters sa Enero 27 sa San Roque Parish sa Subangdaku, National Shrine of Saint Joseph ug Holy Family Parish sa Maguikay.
Kini gipaabot nga tambungan sa mokabat 5,000 ka batan-on nga delegado gikan sa nagkalainlaing nasud nga magparada gikan sa Dakbayan sa Lapu-Lapu subay sa Mactan-Mandaue Bridge, dalan Plaridel paingon sa Mandani Bay. (Romeo T. Limpangog/GMR)(BANAT NEWS)