CEBU, Philippines – Gipaspasan sa kagamhanan sa dakbayan sa Sugbo ang paghawan sa dapit nga nasunogan sa Sitio Avocado, Barangay Lahug aron makapahawa na gikan sa classrooms sa Lahug Elementary School ang mga pamilya nga biktima sa sunog.
Bisan og adlaw’ng Sabado kagahapon, apan walay hunong ang mga buldozers sa City Hall ingon man ang mga kawani sa dakbayan, sa pag-andam sa lugar nga nasunogan aron kini magamit dayon pagbalik sa mga biktima’ng pamilya.
Dul-an sa 200 ka pamilya ang nasunogan sa ilang panimalay nga miulbo usa ka adlaw liwas sa Pasko. Ang mga pamilya misugat sa Bag-ong Tuig didto sa mga classrooms nga gibutangan kanila sa City Hall.
Matud sa pangulo sa Division for the Welfare of Urban Poor (DWUP) nga si Atty. Collin Rosell nga gipaspasan nila ang pagpanghawan sa dapit aron makabalik na ang mga biktima sa sunog.
Si Acting Mayor Edgardo Labella miawhag sa kadagkoan sa University of the Philippines (UP), nga nangangkong maoy tag-iya sa yuta, nga tugotan lang ang mga hingtungdang pamilya sa pagtukod pagbalik og panimalay.
Matud ni Rosell nga tinguha nila nga makabalik na ang mga biktima sa sunog didto sa dapit-nasunogan bisan sa temporaryo lang usa nga panimalay aron ang mga classroom magamit na sa mga tinun-an.
Si Cebu Archbishop Jose Palma malaumon nga magkasinabtanay ang kadagkoan sa UP ug City Hall aron matabangan ang mga biktima sa sunog.
Giangkon ni Palma nga wala gayud siya nasayod sa gisabotan sa matag habig apan iyang gipanghinaot nga para kini sa kaayohan sa mga nasunogan nga dili na kaayo sila mag-antos sa grabeng kalisod.
Naglaom si Palma nga unta ikonsiderar sa matag habig ang sitwasyon sa mga nasunogan kay sa ilang tagsa-tagsa ka mga interest.
Andam si Palma nga moabag alang sa mga biktima sa sunog kun ila lang maabot. (Rowena D. Capistrano ug Sheriza Mae R. Uy/RUB) (BANAT NEWS)