CEBU, Philippines - Dili gyud matagna ang kapalaran sa usa ka tawo. Apan ang labing siguro, kadtong mga tawong magtinapolan ug mas daghan og reklamo inay nga motrabaho wa gyuy padulngan.
Kaniadto katabang lang sa iyang ig-agaw si Celedonio “Daddy Cake” Potot Jr. ug gani delivery boy lang siya kaniadto kapin sa napulo na ka tuig ang nakalabay.
Karon, delivery boy gihapon siya apan siya na maoy tag-iya sa ilang gamay nga negosyo.
Ang iyang ig-agaw nagnegosyo og kinahon nga cakes nga sagol-sagol ang klase nga maoy iyang ihatud sa mga kustomer niini matag adlaw bugti sa inadlaw nga suholan.
Sa pagdagan sa panahon nga siya delivery boy og cake nakahunahuna siya nga wala siyay padulngan kun dili siya mosuway og tikang sa mas taas nga ang-ang ilabi na nga nagkadako ang iyang pamilya ug nagkadako usab ang ilang inadlaw-adlaw nga panginahanglan.
Si Daddy Cake nga gitawag usab sa iyang mga kahigalaan sa angga nga Jojo, adunay upat ka mga gipaeskuyla nga mga anak nila sa iyang kapikas sa kinabuhi nga si Celia.
Aduna siyay usa ka high school ug duha ka elementarya samtang ang kinamaguwangan usa na karon ka seaman.
Matud pa niya nakahuwam siya og gamay nga puhonan gikan sa kwartang inutang sa iyang inahan kaniadto ug maoy iyang gipamalit og gamit aron sa pagluto sanglit nakat-onan na man nilang duhang magtiayon kun unsaon kini paghimo.
Kaniadto atoa sa layo ang iyang asawa samtang siya nanginabuhi pagka-delivery boy og mga cakes sa iyang ig-agaw ngadto sa mga kustomer niini.
Apan dihang siya nay nisuway ug nangunay pagpangluto niini, gidala na niya ang iyang pamilya pagpuyo diha sa Brgy. Hipodromo ning Dakbayan sa Sugbo.
Sagad sa ilang mga parokyano mao ang nagkalain-laing mga kan-anan, mga tindahan nga namorsiyento usab matag box niini ug kadtong mga kahigalaan ug mga tawong nangahenti usab sa ilang produkto.
Namalit sila og presentableng cardboard boxes (magdepende sa okasyon ang desinyo ug sa kolor) nga maoy sudlan sa ilang niluto nga cakes.
Magdepende sa order, adunay mga kustomer nga gusto anaa ang tanang upat o tulo o ba kaha usa lamang ka klase nga matang sa cake ang sud. Ang presyo niini P170 matag box. Ang upat ka klaseng cakes naglangkob sa cassava cake, chocolate cake, macaroons o ba kaha maha blanca. Kini diha mismo sa ilang balay gimasa ug giluto sa ilang oven.
Okasyon
Hinuon dili tanang panahon kusog ang halin o order sa mga cakes. Adunay mga bulan nga dili kaayo kusog ilabi na kun walay mga okasyon o selebrasyon apan dili gyud mahitabong walay mamalit o mo-order sa usa ka adlaw.
Matud pa niya, kung walay mga okasyon kinahanglan nilang makahimo og 47 boxes nga cakes matag adlaw alang sa ilang pang adla-adlaw nga panginahanglan.
Apan matag bulan sa Disyembre kini maoy labing kusog tungod sa kadaghan sa mo-order ug mamalit tungod sa wala’g-tuo nga parties ug pang-regalo.
Gani magkapuliki sila pag-apas sa mga orders nga mokabat og usa ka libo ka boxes ang kinahanglan nilang mahimo.
Tungod usab niini, hinay-hinay usab nilang natampo sa uban ang ilang grasya kay manuhol na man sila og mga silingan aron motabang sa pagluto ug paghan-ay.
Matud niya, sa mga ordinaryong adlaw kinahanglan silang makaluto og 47 boxes alang sa ilang mga suki.
Sama sa ubang negosyo, di gyud kalikayan nga utangon ang ilang baligya ilabi na sa ilang mga suki, aduna say cash on delivery. (BANAT NEWS)