CEBU, Philippines – Nalandig sa tambalanan ang usa ka amahan human kini nadunggaban sa iyang pag-umangkon nga iyang gisanta kay gisuwayan niini og lugos ang duha ka anak sa biktima kagahapon sa kaadlawon sa usa sa mga barangay sa Lungsod sa Argao.
Ang Banat News nitago una sa mga pangalan sa mga nalambigit sa maong hitabo aron taguon ang ilang pagkatawo.
Apan base sa report, gidala dayon sa Isidro Kintanar Memorial Hospital sa Argao ang biktima tungod sa samad dinunggaban ug ang iyang 15-anyos nga dalagitang anak samaran usab sa iyang kamot.
Ang suspek gidakop sa mga igsuon sa mga dalagita human nga nadakpan kini nila nga suway nga milayas human sa hitabo.
Base sa taho nga ang mga dalagita gikan misuroy sa diskohan kay opening salvo sa Sabado sa gabii alang sa kapistahan sa maong barangay.
Apan dihang nauli na sila nagtupad sila og higda ug nakabantay ang 15-anyos nga murag may mikamang kaniya hinungdan nga pwerte niining lugnot.
Nasamad ang kamot niini sa paglugnot samtang ang iyang 17-anyos nga maguwang babaye gituok sa suspek aron dili mosaba kay nakamata man usab kini sa komosyon.
Ang amahan sa duha nga nakamatngon sa kaguliyang misusi sa kwarto sa mga dalagita ug iyang nakit-an ang usa ka lalaki sa sulod hinungdan nga iya unta kini nga giwakli.
Apan gidunggab man hinuon siya sa lalaki diha sa tiyan. Ang lalaki nagsul-ob og hood daling midagan pagawas.
Apan nakit-an kini sa tanang mga kabanay ug gitabangan og gukod hangtud nga naabtan ug mao na lay ilang kakurat nga ilaha usab diay kini nga ig-agaw igtagsa ug gipadakop nila sa polis. – /EIM) (BANAT NEWS)