CEBU, Philippines – Sugod karong adlaw nga Lunes, ipaubos na sa Department of Health sa Code White Alert Status ang tanang mga pampublikong tambalanan sa rehiyon agi og pagpangandam sa pagsugat sa Pasko ug Bag-ong tuig.
Matud pa ni Renan Cimafranca, pangulo sa Regional Epidemeology and Surveillance Unit, wala pa silay natala nga adunay nabiktima sa mga pabuto, apan gipanglantawan nila nga posibleng motumaw ang kaso niini sunod semana.
Sumala pa ni Cimafranca, aron malikayan ang maong kaso, giawhag nila ang katawhan nga magmatngon kanunay aron dili mahimong biktima.
Gipahibalo usab ni Cimafranca nga nagsugod na sila karon pagpakatap og mga posters nga diin nagpahimangno sa mga dili angay buhaton ilabi na ngadto sa mga mahiligon sa pabuto.
Apan bisan pa man sa panawagan sa DOH sa kapolisan ug sa mga local government units pinangulohan sa mga mayor, nabantayan sa Banat News nga daghan na karong mga tindahan ang tago-tago nga namaligya og mga pabuto lakip na ang gidili nga Piccolo nga adto nila ibaligya sa mga bata.
Nabantayan usab nga bisan sa pagsige og pabuto sa mga bata diha sa daplin sa kadalanan gamit kining Piccolo way mga barangay tanod o opisyales sa barangay ang mihimo og mga lakang aron badlungon kini.
Ang Piccolo maoy kinadaghanan og naangol nga kabataan sud sa nanglabay nga tulo ka tuig tungod kay kompiyansa lamang ang mga bata ug mga ginikanan kay hinay kining mobuto, apan nasayran sagad sa nangabuthan niini, wala mangapungkol ang tudlo kondili nangabuta ang mata.
Mipahimangno usab ang DOH sa posibleng pagkuyanap sa sakit nga makuha gikan sa kontaminadong pagkaon ilabi na kung dili kini maayo pagkapreparar.
Awhag usab ni Cimafranca ngadto sa katawhan nga mahiligon sa kaon niining panahon sa party everywhere ug Pasko nga hinay-hinay lang aron malikayan ang mga sakit sama sa high blood pressure ug uban pa. (BANAT NEWS)