CEBU, Philippines – Grabe’ng naangol ang amang nga lalaki nga gidunggab sa amang usab nga babaye nga hinigugma niini sa Barangay Lamac, Lungsod sa Consolacion alas 8 pasado sa niagi’ng gabii.
Si Police Officer 1 Socrates Borinaga niila sa biktima nga si Margien Cabahug Barte, 30-anyos nga taga Barangay Jugan.
Ang suspek mao si Sharon Sanchez Agdon, 32-anyos nga taga Sitio Bayong, Barangay Cadulawan, Lungsod sa Minglanilla.
Dugang ni Borinaga nga nagkita ang biktima ug ang suspek sa usa ka tindahan sa Barangay Pitogo, Consolacion ug nagkasabot nga moadto sa Barangay Lamac pinaagi sa pag-angkas sa motorsiklo nga gidala sa biktima.
Sa paghidangat sa nahisgutang dapit, kalit lang niibot ang hinigugma sa gidala niini nga kutsilyo ug gidunggab ang biktima sa tiyan ug uban pa’ng bahin sa lawas.
Nakadagan pa ang biktima ug nakapangayo og panabang sa mga habal-habal drayber nga nahiagi sa mao’ng lugar ug dali kini’ng gihatud sa ila’ng panimalay ug ang suspek dali nga nisibat.
Matud ni Borinaga nga ang mga igsuon na sa biktima ang nidala sa Mendero Hospital nga nahimutang usab sa lungsod.
Ang suspek nga nibalik usab sa tindahan nga ila’ng gitagboan sa wala pa nahitabo ang pagpanunggab ang dali’ng gidakop sa kapolisan hinungdan sa pagkabalhug sa bilanggoan.
Base sa gisuwat sa suspek sa hinungdan sa pagpanunggab nasayran nga nagselos lang kini ngadto sa biktima. – /GMR) (BANAT NEWS)