CEBU, Philippines – Patay na nga nadangat sa tambalanan ang usa ka babaye nga buntis human kini nag-inom og hilo gumikan sa grabeng selos nga gibati niini sa iyang kapuyo diha sa Barangay Masa lungsod sa Dumanjug niadtong nakalabay nga hapon.
Ang gituohang naghikog mao si Elisa Debalucos, 27, walo ka bulan nga buntis ug nagpuyo sa maong dapit.
Sa pasiunang imbestigasyon nga gihimo sa Dumanjug Police nga gipangunahan ni Police Officer 3 Ferdinand Imperial ug mga kaubanan nasayran nga human nanghakot og kahoy ang iyang kapuyo nga si Jopel Llena miadto kini sa iyang silingan ug nakig sing-along ug nagtagay-tagay.
Pipila ka minutos ang milabay kalit lang giapas ni Debalucos si Jopel nga nalingaw na og tagay kauban ang ilang mga silingan ug gisampalong kini.
Human sa hitabo miuli sa ilang gipuy-an ang babaye nga walay tingog-tingog samtang ang kapuyo mipadayon gihapon sa iyang gibuhat ug alas-4 na sa hapon nipauli ug didto nakugang na lang pagkakita kang Debalucos nga naghawid na kini og usa ka sachet sa hilo nga Lanate usa ka matang sa insecticide.
Sulay pa unta nga gibunlot ni Jopel ang hilo gikan ni Elisa apan human na diay nga nakainom sa maong hilo ang babaye ug pagkataod-taod nawad-an kini sa iyang panimuot maong gidali niya kini pagdala sa Barili District Hospital apan nakabsan kini sa iyang kinabuhi.
Ang kapulisan padayon pa nga misubay sa tinuoray nga motibo sa hitabo apan sa ilang nasayran nga dali mangabubho sa kapuyo si Debalucos.
Ang kapulisan mitambag ni Jopel nga ipaubos sa otopsiya ang lawas sa namatay apan wala kini mihatag og tubag kanila. – /EIM) (BANAT NEWS)