CEBU, Philippines – Gigapos, gibalian sa liog ug gituohang gilugos ang usa ka 13 anyos nga batang babaye nga nakit-ang patay diha sa hilit nga bahin sa Sitio Tulayon, Barangay Ablayan lungsod sa Dalaguete sayo sa buntag kagahapong adlawa.
Ang biktima giila nga si Jenelyn Dela Torre Pia, temporaryo nga nagpuyo sa usa ka pamilya sa maong dapit isip katabang aron adunay ikagasto sa iyang pagtungha sa grade 7, apan lumad siya nga taga Barangay Mantalungon.
Matud pa ni Police Officer 1 Julie Villahermosa, desk officer sa Dalaguete Police nga nahinabi sa Banat News gawas nga gibalian sa liog ang biktima gipakaon pa sa iyang baba ang iyang panty.
Sumala pa ni Villahermosa nga katapusang nakit-ang buhi ang biktima pasado alas-6 sa nakalabay nga hapon sakay og mini bus paingon sa iyang gipuy-an.
Usa ka residente nga nagpuyo sa maong dapit ang nakakita sa patay nga lawas sa biktima.
Base sa inisyal nga resulta sa autopsy nahilabtan gyud ang biktima.
Sa crime scene gawas sa pisi nga gigamit sa kriminal narekober usab sa kapulisan ang usa ka tsinelas nga gituohang iya sa kriminal.
Nagduda si Villahermosa nga posibleng gisundan o giatangan sa rapist-killer ang biktima ug kay misukol brutal niya kining gipatay ilabi pa kay mingaw ang lugar ug wala’y makatabang sa biktima.
Padayon ang gihimo nga imbestigsayon sa kapulisan sa Dalaguete aron pag-ila ug pagsikop sa kriminal. – /EIM) (BANAT NEWS)