CEBU, Philippines – Gisusi karon sa kapolisan ang napalgang sako nga ang sulod kalabira sa tawo nga gituohang gi-salvage ug gilabay sa pangpang sa Sitio Canduwang, Barangay Damolog, Lungsod sa Sogod.
Si Police Officer 1 Ivan Rey Davidon sa Sogod Police Station miingon nga usa ka molupyo nga nailang si Mario Monisit nga nagpuyo sa maong dapit maoy nakakaplag sa sako nga adunay sulod nga mga bukog sa tawo. Dali niya nga gipahibalo ang kapolisan bahin sa iyang nakaplagan nga matud pa nanimaho pa apan bukog na ang sud sa sako.
Wa pa matino kun iya sa lalaki o babaye ang maong kalabira ug kun unsang paagiha kini namatay.
Ang kapolisan midala sa maong mga bukog sa PNP Crime Laboratory alang sa forensic examination. – /EIM) (BANAT NEWS)