CEBU, Philippines - Nakalas ang usa ka tinun-an sa Grade 8 human napunggit sa dumptruck nga nawagtangan og brake sa Sitio Acacia, Barangay Uling, Dakbayan sa Naga ala-1:30 sa hapon niadto’ng Martes.
Ang biktima mao si Janely Mae Ayento, 13-anyos, tinun-an sa Uling Elementary School samtang ang driver sa dumptruck mao si Marcos Bunao, 44-anyos, taga Biasong, Balamban.
Ang dumptruck gikan sa Toledo City apan kalit nawagtangan og brake.
Giingong una’ng naigo ni Bunao ang Hyundai Sedan nga gimaneho ni Nicholas Paran, 49-anyos, ug nilahos sa Fuzo Truck nga gimaneho ni Hermilito Lara ug niliko padulong sa gutter diin naglataylatay ang bata nga si Ayento.
Dali pa unta nga gidala sa tambalanan ang biktima apan gideklarar sa mga doctor nga dead on arrival samtang si Bunao dali sab nga nisurender sa kapolisan. (BANAT NEWS)