CEBU, Philippines – Posible’ng dili matuki sa konseho sa Siyudad sa Talisay ang supplemental budget nga giduso ni Mayor Johnny de los Reyes (JVR) sa kantidad nga P74 milyones atol sa sesyon karong adlawa.
Kini human wala makatambong sa ila’ng caucus ang mayoriya sa konseho nga sakop sa Alayon Party.
Si Bise Mayor Romeo Villarante nibutyag nga adunay gipahigayon nga pilgrimage gikan sa Basilica Minore del Sto. Niño paingon sa Simala, Sibonga nga gitambungan sa mga konsehal.
Si Villarante niingon nga gipanglantawan na niya’ng daan nga ang gipangayo’ng budget ni JVR ang dili matuki karong semanaha.
Si Konsehal Edward Alesna, tsirman sa committee on finance and appropriations, usa sa nikuyog sa kalihukan.
Matud ni JVR nga ang gihimo sa konseho tataw nga paglangay-langay sa pag-aprobar sa budget.
Nasayran nga si Konsehal Aldin Diaz ang nangayo og lista sa mga job order nga wala maswelduhi aron masusi og kun kini tagaan ba sa sakto’ng gipangayo nga budget ang mayor.
Lakip sa gipangayo nga supplemental budget sa mayor ang P9 milyones nga sweldo sa mga job order employees.
Matud ni Diaz nga ang supplemental budget number 2 ug 3 ang nitagana na og sweldo sa mga JO workers hangtud sa buwan sa Disyembre.
Ang pamahayag ni Diaz ang gidasunan ni City Budget Officer Edgar Mabunay atol sa ila’ng caucus sa nilabay’ng semana.
Lakip sa gusto’ng mahibaw-an ni Diaz mao ang job order workers ug confidential assistants nga kaliwat ni JVR. – /GMR) (BANAT NEWS)