CEBU, Philippines - Human gi-endosar ni Gobernador Hilario Davide III ang grupo ni Mayor Nicepuro Apura sa dakbayan sa Carcar kagahapon, ang ubang mga sakop sa Alayon Party sa una’ng distrito ang nagpaabot sab sa gobernador.
Apan si Naga City Mayor Valdemar Chiong nipahimangno sa gobernador nga dili mokompiyansa tungod kay ang iya’ng gihatagan og certificate of nomination and acceptance (CONA) sa Liberal Party ang posible nga dili mopaluyo kaniya.
Si Chiong ang nipadayag sab nga ang iya’ng anak nga si Atty. Kristine Vanessa Chiong nga mohulip kaniya ang i-endosar sab unta sa gobernador sama sa gibuhat sa grupo ni Apura.
Gipasabot ni Mayor Chiong nga nituman gyud sa saad si Davide ngadto kanila human sila nagtagbo uban sa mga sakop sa Alayon Party diha’ng iya’ng gitagaan og CONA sa LP ang kaatbang sa mayor sa Alayon bisan sa hangyo ni Kong. Gerald Anthony "Samsam" Gullas nga dili patagaan.
Nagkanayon si Chiong nga maayo sab kini’ng bantayan sa gobernador kun tinuod ba ang nanggawas nga report nga si San Fernando Mayor Antonio Canoy nga nagpasakop sa Nationalist People’s Coalition ug moatbang kang Gullas mopaluyo kini kang Atty. Winston Garcia ug Senador Grace Poe sa pagka-presidente.
Si Canoy nga orihinal nga sakop sa LP ang nahiubos human nga si Gullas na hinuon ang giila sa partido nga opisyal nga kandidato sa pagka-kongresista. Matud ni Chiong nga ang mga mayor nga nahatagan og CONA sa LP hayan mokuyog kang Canoy.
Uban ni Canoy nga gipalagpot sa LP mao si Bise Mayor Romeo Villarante nga magpapili sa pagka-mayor sa siyudad sa Talisay ug nitapon sa NPC ug mosuporta kang Garcia. (BANAT NEWS)