CEBU, Philippines - Dili lang ang Philippine National Police lakip usab ang Armed Forces of the Philippines ang mag-monitor sa mga private armed groups nga magamit sa mga politiko sa umaabot nga piniliay.
Matud ni Lt. General Nicanor Vivar, kumander sa AFP-Central Command, nga adunay executive order nga ang tanang bodyguards, polis man o sundawo, kinahanglang mobalik sa kampo panahon sa eleksiyon.
Pinaagi sa pagpakig-alayon sa kapolisan, ila’ng monitoron kadto’ng mga politiko nga adunay private armed group.
Tinguha sa kasundaluhan nga ang umaabot nga piniliay sunod tuig mahimo’ng hapsay ug malinawon ug wala’y dugoong panghitabo.
“Doon sa mga politicians na may mga goons, meron kami’ng mga tao na nag-monitor sa kanila and we will make sure that this coming election will be honest and peaceful,” matud ni Vivar.
Gipasalig ni Vivar nga sila sa CentCom dili manginlabot sa politika isip non-partisan.
Kauban sa kapolisan, ila’ng tinguhaon nga kadto’ng mga goons o private armed groups nga adunay plano’ng motisok og kagubot ila’ng pugngan.
Kahinumduman nga gimanduan ni Police Regional Office-7 Director Prudencio Tom Bañas ang iya’ng intelligence officer sa pagpaubos sa assessment sa grupo sa mga armado nga naglihok sa probinsya sa Sugbo.
Matud ni Bañas nga aduna na sila’y mga listahan sa mao’ng grupo apan ila pa kini’ng susihon kung aktibo pa ba sukad sa nanglabay nga mga eleksyon. (BANAT NEWS)