CEBU, Philippines – Gilubong na kagahapon sa buntag ang diving instructor nga namatay human gilabay og dinamita sa kadagatan sa Paypay, lungsod sa Daanbantayan.
Gimisahan ang patay’ng lawas ni Al Bernard Coyoca sa Our Lady of Fatima Parish, Basak, Mandaue City nga gitambungan sa pamilya, paryente ug kahigalaan ug gisunod dayun ang paghatud ngadto sa Manila Memorial sa lungsod sa Liloan.
Matud ni Lorna Coyoca, inahan sa namatay, nga magpaabot sila sa resulta sa autopsy aron ila’ng masayran kung unsa’y sunod nila nga buhaton ug mopasaka usab sila og kaso aron makab-ot nila ang hustisya.
Sumala pa sa inahan nga gumikan sa kamatayon sa iya’ng anak, mopahigayun sila og awareness aron masumpo na ang illegal fishing ug illegal nga paggamit og dinamita aron dili na masubli ang nahitabo sa iya’ng anak ngadto sa laing mga tawo.
Awhag ni Lorna ngadto sa mga tawo nga makakita sa mga ilegal nga binuhatan sa lugar sa pagsumbong niini ngadto sa mga hingtungdan nga ahensya aron masumpo ug ngadto sa mga naa sa kagamhanan nga unta responsable sila sa pagsumpo sa ilegal nga kalihukan ug butangan nila og ngipon ang balaod.
Emotional nga gihulagway sa inahan ang iya’ng anak nga usa ka lambing nga pagkatawo ug kung kabubut-on sa Ginoo ang kamatayon sa iya’ng anak aron nahimo kini’ng instrumento aron masumpo ang ilegal nga kalihukan sa kadagatan, iya ra usab kini nga ikalipay.
Hustisya mao’y panawagan sa tanang mga tawo nga nitambong sa paghatud sa kapahulayan nga dayun sa namatay.
Samtang ang kapolisan sa Daanbantayan nagpaabot na lang karon og dugang mga dokumento aron sa pagpasaka og kaso batok sa usa sa mga suspek nga ila’ng nadakpan nga naaktuhan nga naggamit og dinamita nga si Jindo Pepito. - /GMR) (BANAT NEWS)