CEBU, Philippines – Pipila ka grupo ang nag-rally paingon sa Radisson Blu diin gipahigayun ang Asia-Pacific Economic Cooperation (APEC) Meeting.
Kini tungod kay buot nila nga manawagan nga malakip nga matuki sa meeting ang dugang trabaho para sa nasud.
Matud sa bise-presidente sa Association of Barangay Councils sa dakbayan sa Sugbo, barangay Tinago Kapitan Joel Garganera, kinsa nag-atiman sa seguridad, nga gibanabana nga mokabat sa 50 ka miyembro sa nagkalainlaing grupo ang nisalmot sa gipahigayung rally kagahapon sa hapon.
Dugang ni Garganera nga kadaghanan sa niuban sa rally ang mga apektado sa demolisyon sa dakbayan sa Sugbo sama sa Doña Pepang, sitio Mahusay, Carreta, R. Palma ug uban pa.
Hinuon gihulagway ni Garganera nga hapsay ug malinawon lang ang pagpahigayun sa rally ug may kapolisan ug mga enforcers ang nisunod sa mga raliyista aron paghapsay sa dagan sa trapiko ug seguridad.
Nisubay ang mga raliyista sa Doña Pepang Cemetery, R. Palma, Mango Avenue ug Department of Labor and Employment gikan sa Jones Avenue. - /GMR) (BANAT NEWS)