CEBU, Philippines - Naangol ang tulo ka sakop sa usa ka pamilya human nabanggaan ang gisakyang motorsiklo sa usa ka sakyanan sa Sangi, dakbayan sa Toledo. Ang mga naangol nga sila si Bernard Canillo, kapuyo niini nga si Maricor Cabalse ug 8-anyos nga ila’ng anak nga si Keith Bryle Canillo, taga sitio Cantigay, Media Once.
Ang nakabangga sa ilang motorsiklo mao ang Toyota Hilux nga gimaneho sa usa ka Prudencio Razo, taga 6382 Camia St, Guadalupe Viejo, Makati City.
Sa imbestigasyon sa traffic section sa Toledo City Police Station nasayran nga ang mga biktima paingon unta mangaligo og dagat.
Diha’ng niliko na unta ang motor, kalit nga nibutho ang sakyanan ug nibangga sa mga biktima.
Maayo’ng pagkalukapa sa mga biktima nga nakaangkon og samad ug pangos sa nagkadaiya’ng parte sa kalawasan.
Gidala sa Toledo City Hospital ang mga biktima apan gibalhin sa Vicente Sotto Memorial Medical Center sa dakbayan sa Sugbo.
Samtang andam si Razo nga moabaga sa mga galastuhan sa tambalanan sa mga biktima. (BANAT NEWS)