CEBU, Philippines – Daghang lumolupyo sa Barangay Sapangdaku ug Pamutan ang nahasol tungod kay dili sila makaagi sa karsada tungod sa midahili nga lapok tungod sa sagunson nga pag-uwan.
Si Konsehal Dave Tumulak, presiding officer sa Cebu City Disaster Risk-Reduction Management Council (CCDRRMC), mitug-an nga natabonan g’yud ang tibuok karsada nga agianan paingon sa Barangay Pamutan.
Ang Barangay Pamutan nahimutang sa ibabaw pa nga bahin sa Barangay Sapangdaku, nga anha agion sa Barangay Guadalupe, paingon na sa bukid.
Gipasabot ni Tumulak nga tungod sa pagtuhop g’yud sa tubig ngadto sa yuta dili na makapiog ang lapok sa kabug-at hinungdan sa pagdahili bisan pa man og wala’y uwan sa miaging Domingo sa gabii.
Nadawat ang report ni Tumulak gikan ni Sapangdaku Kapitan Lorna Damalerio kaniadtong Domingo sa gabii apan kagahapon na sa buntag napadad-an og mga ekipo ang maong dapit.
Sanglit maglisud man pag-agi ang mga sakyanan sa dapit nga adunay mihulpa nga lapok, nagpuli-puli pag-agi ang mga tawo aron lang makalahos sila sa ilang padulngan. Ang nahasol pag-ayo mao ang nagtumod sa mga abot sa kaumahan.
Samtang sa laing bahin, 32 pa gihapon ka barangay sa 80 ka barangay sa dakbayan sa Sugbo ang wala pa makasumiter og purchase request nga gikinahanglan aron makaangkon sila og mga ekipo nga magamit para disaster nga nagkantidad og P1 ka milyon kada barangay.
Matud ni Tumulak nga dili makakuha ang barangay sa ekipo kun dili sila mosumiter sa gipangayo nga dukomento sa Bids and Awards Committee.
Hangtud na lang karong October 31 ang deadline sa BAC alang sa 32 ka barangay nga mosumiter sila sa gipangayo nga purchase request.
Gipasabot ni Tumulak nga ang kabarangayan, ilabi na ang mga landslide-prone, nga kinahanglan nga mosumiter na sila sa maong request aron magamit sa pag-rescue kun dunay katalagman nga mahitabo. – /RUB) (BANAT NEWS)