CEBU, Philippines - Pakigtagboan ni Cebu City Vice Mayor Edgardo Labella ang kapolisan ug mga opisyal sa Department of Social Welfare and Development (DSWD) kabahin sa dili pa sila molusad og kampanya batok sa mga rugby boys.
Si Labella nakadawat og reklamo nga midagsang ang mga batan-ong rugby boys nga sagad anha maghimo sa ilegal nila nga kalihukan sa Mahiga Creek duol sa usa ka dakong tindahan sa mao nga dapit.
Ang bise mayor nga maoy tsirman sa Police Coordinating Advisory Council (PCAC) miingon nga kinahanglan gayud nga makigtambayayong sila sa DSWD aron dili sila makalapas sa balaod.
Ang Republic Act 9344 nagdili sa pagdakop sa mga batan-on bisan og sila makahimo og salaod mao nga si Labella nagpahimangno sa kapolisan ug mga tanod nga sila angay’ng magbantay.
Sigun sa report nga nadawat ni Labella ang mga batan-on nga maghingos og rugby diha sa Mahiga Creek duol sa usa ka Mall, gibana-bana nga nagpangedaron og 14 ngadto sa 17-anyos.
Gusto ni Labella nga motambong usab atol sa ipatawag niya nga tigum ang mga opisyal sa Barangay Apas, Banilad ug Kasambagan aron magkatinabangay sila pagsulbad sa problema. (BANAT NEWS)