CEBU, Philippines – Nabulit og samad dinunggaban sa kalawasan ang usa ka lalaki human kini gitabangan og dunggab sa iyang mga silingan diha sa Sitio Sosco Lim Kaking, Banawa, Brgy. Guadalupe ning dakbayan sa Sugbo sa miaging gabii.
Giila ang biktima nga si Metodio Abaneil, nagpuyo sa maong dapit. Samtang ang mga suspek mao sila si Jereck Maquilang, ug laing lalaki nga nailhan lang sa alyas “Ken.”
Sa imbestigasyon nga gihimo sa Homicide Section sa Cebu City Police Office nga gipangulohan ni Senior Police Officer 4 Alex Dacua ug mga kaubanan nasayran nga samtang naglingkod ang biktima sa maong dapit kalit lang miabot ang duha ka suspetsado nga armado og kutsilyo ug diretsong gitabangan og dunggab ang biktima.
Dali nga misibat ang duha samtang gidala sa Vicente Sotto Memorial Medical Center (VSMMC) si Abaniel apan patay na kini pag-abot didto.
Nasayran sa kapulisan nga dugay nang nagbikil ang mga suspetsado ug ang biktima ug gituohang nangita lang og tayming ang duha aron makabalos. – /EIM) (BANAT NEWS)