CEBU, Philippines - Gidakop sa kapolisan ang usa ka 46-anyos nga lalaki nga gipasanginlan nga milugos sa upat pa lang ka tuig nga bata’ng babaye nga iyang silingan sa Purok Santan, Barangay Opao, dakbayan sa Mandaue.
Si PO1 Diane Bacay sa Women Section sa Presinto 5 sa Mandaue City Police Office (MCPO) mitug-an nga gidakop nila si Alex Seville didto sa iyang panimalay kaniadto’ng miagi’ng hapon.
Matud ni PO1 Bacay nga nahibaw-an nila sa imbestigasyon nga ang bata miadto sa panimalay ni Seville kay nakigdula kini sa bata nga anak sa suspetsado.
Nasayran nga milakaw ang asawa ni Seville nga maoy hinungdan nga nakahigayon ang suspetsado kay ang bata nalingaw usab tungod kay gipaduwa man kini sa iyang tab.
Ang polis miingon nga ang mga ginikanan sa biktima nahibulong tungod kay naghilak man ang bata nga mipauli ug nagping-it sa kasakit sa iyang bilahan.
Si PO1 Bacay miingon nga gidala sa inahan ang iyang anak ngadto sa police station ug diha nga ilang gisukit-sukit nahibaw-an nila ang gihimo sa suspetsado ngadto sa bata.
Kini maoy hinungdan nga dali nga gidakop nila ang suspetsado nga si Seville ug gibalhog sa selda samtang giandam pa ang tukma’ng kaso nga ipasaka batok kaniya sa hukmanan.
Si PO1 Bacay miingon nga nagpaabot na lang sila sa resulta sa medical examination aron maoy makapalig-on sa kaso nga ilang ipasaka karong sunod semana. (Romeo T. Limpangog/RUB)(BANAT NEWS)