CEBU, Philippines - Si Cebu City Vice Mayor Edgardo Labella miawhag sa kadagkoan sa Department of Public Works and Highways (DPWH) nga hunongon usa ang pagguba sa duha ka karaan nga balay sa daplin sa M.J Cuenco Avenue, Barangay Mabolo.
Matud ni Labella nga ang iyang awhag sa pagpahunong sa pagguba naggumikan kay ang tag-iya sa estraktura nangangkon nga karaan ug adunay historical value ang mao nga balay.
Ang Republic Act 10066 naglatid nga angayang protehean sa kagamhanan ang mga estraktura nga adunay historical value sama kun kini natukod kapin na sa 50 ka tuig.
Matud pa nga nasugdan na ang pagguba sa kabahin sa karaang balay nga gipanag-iya ni Nersas Macasero nga ginganlan gani og “Balay nga Bato.”
Suma pa nga ang mao nga balay nagsilbi kaniadto nga tambalanan . Ang pagpalapad sa M.J. Cuenco Avenue gitumong aron pagsulbad sa problema sa trapiko sa mao nga dapit. (BANAT NEWS)