CEBU, Philippines – Nipahimangno ang direktor sa Department of Trade and Industry-7, Asteria Caberte, sa publiko nga magmatngon sa ila’ng pagpalit og mga Christmas décor ilabi na sa Christmas lights sa paglikay sa disgrasya.
Matud ni Caberte nga buwan sa Oktubre mosulod na ang mga produkto nga dayan-dayan sa Pasko ug hugtanon sila sa pag-monitor niini.
Kini nunot sa mga substandard nga mga produkto sama sa Christmas lights nga ipamaligya sa kamerkaduhan.
Ang publiko gipanawagan ni Caberte nga dili magpataka og pamalit og mga Christmas lights sa paglikay sa disgrasya.
Matud niya nga kinahanglang tan-awon ang label sa produkto kung duna ba kini marka nga Philippine Standard (PS) ug Import Commodity Clearance (ICC) kung ang produkto imported.
Kung wala ang marka, pasabot nga ang produkto wala makapasar sa standard ug dili maayo og kalidad.
Ang publiko gipasidan-an ni Caberte nga kung ang usa ka produkto barato lang kaayo og presyo ilabi na nga diha ibaligya sa aseras kinahanglang dili sila mosalig niini. Si Caberte nipasidaan usab sa mga negosyante nga istrikto sila sa ila’ng kampaniya batok sa mga substandard nga produkto ug i-implementar gyud nila ang balaud sa mga makahimo og kalapasan.
Gawas sa mga substandard nga produkto istrikto usab nila’ng gi-monitor ang mga presyo sa mga palaliton sa kamerkaduhan.
Dugang ni Caberte nga matag semana sila’ng nag-monitor sa mga presyo sa produkto sa kamerkaduhan.
Apan kung may kalamidad nga mahitabo matag adlaw ang ila’ng pag-monitor sa mga presyo sa produkto. – /GMR) (BANAT NEWS)