CEBU, Philippines – Gipapahuway una ug gipang-relibuhan sa ila’ng trahabo kadto’ng mga polis nga duna’y piskat sa mata sa nagbantay sa seguridad sa Asia-Pacific Economic Cooperation Summit.
Kini ang gitug-an ni Senior Supt. Rey Lyndon Lawas, directorial staff sa Police Regional Office-7, aron dili makatakod sa uban ang siyam nga nataptan.
Gawas sa gipiskat, aduna sa’y 57 ka polis ang gipangsip-on ug giubo.
Hinuon si Lawas niingon nga adunay mga sakop sa Department of Health ug PRO-7 ang naglibot aron matagaan og sakto’ng pag-atiman ang mga may balatian.
Kung maulian na ang mao’ng mga polis ibalik sila sa ila’ng lugar nga nadestinohan hangtud mahuman ang kalihukan.
Gihulagway nga usa sa nakatampo sa piskat ngadto sa mga polis mao ang abog ug init tungod kay sagad kanila nadestino sa road security. Gipahinumduman sa DOH-7 ang tanan ilabi na niadto’ng dunay piskat nga i-dili ang pagkuha gamit ang kamot sa muta sa mata ug dili lugdon.
Importante ang hygiene ug kanunayon ang pagpanghugas sa kamot matag hikap sa mata.
Samtang gipasalig sa Cebu City Transportation Office (CCTO) nga wala’y rerouting ug pagsira sa kadalanan nga maapektuhan sa pagsuroy sa mga delegado sa APEC Summit karong adlawa.
Matud ni CCTO executive director, Atty. Rey Gealon, nga hatagan og prayoridad ang mga delegado sa APEC sa ilang paglabay sa mga dalan.
Gikatakda nga duawon ang mga heritage site sa dakbayan sa Sugbo sama sa Fort San Pedro, Magellan’s Cross, Parian, Basilica Minore del Santo Niño, San Diego Ancestral House, dalan Colon, Osmeña Boulevard, JY Square, IT Park ug SRP Sugbo ug SM Seaside Cube. Gilauman nga adunay 50 ka delegado ang mosuroy ubanan sa convoy sa Cebu City Police Office ug CCTO. – Decemay P. Padilla ug Sheriza Mae R. Uy/GMR) (BANAT NEWS)