CEBU, Philippines - Nalangan ang pagtukod sa building alang sa Cebu Women and Children’s Crisis Center sa Sitio Sudlon, Barangay Lahug, dakbayan sa Sugbo kay adunay nagpuyo sa luna ingon man wala’y permit sa pagpamutol sa mga kahoy sa lugar nga gipanag-iya sa Kapitolyo.
Ang pagatukoron nga crisis center building mao unya ang puy-an sa kababayen-an ug kabataan nga biktima sa pagpangabuso.
Si Cebu Provincial Engineer Hector Jamora mibutyag nga upat ka buwan na nga nahunong ang pagmugna sa proyekto tungod sa duha ka pamilya nga nagpuyo sa lugar nga wala pa mamahawa.
Ang Kapitolyo wala pa usab makakuha og permit gikan sa Department of Environment and Natural Resources (DENR) sa pagpamutol sa mga kahoy nga apektado sa pagatukoron nga building. Matud ni Jamora nga nag-apply na sila og permit ug naghuwat na lang sila sa approval sa DENR. Ang building gisugdan na sa pagtukod ug 25 porsiyento na ang nahuman. (BANAT NEWS)