Gibuwagan naghikog

CEBU, Philippines - Usa ka menor de edad ang naghikog pinaagi sa pagpusil sa iyang ulo  tungod gibuwagan sa uyab didto sa Sitio Guisi, Brgy. Agus sa dakbayan sa Lapu-Lapu sa miaging Martes sa buntag.

Ang maong bata 16-anyos  wa na magtungha ug residente sa maong dapit.

Si Police Officer 3 Ronald Ong sa Lapu-Lapu City Police- Homicide Section nagkanayon nga sa wala pa nahitabo ang paghikog, ang inahan  naglaba   niadtong tungora dihang nakadungog kini og usa ka buto gikan sa pusil.

Tungod sa kakuryuso niini, daling mibalik sa ilahang balay ang inahan ug iyahang napalgan nga naghigda ang iyang anak ug nagkadugo ang ulo niini.

Gidala sa Lapu-Lapu City District Hospital ang menor de edad apan gideklarar kining dead-on-arrival ni Dr. Alicia Cortez.

Nakit-an sa crime scene ang usa ka improvise nga shot gun, usa ka basiyo sa bala niini ug usa ka botilya sa ilimnong makahubog.

Sigon sa amahan ngadto sa kapolisan nakabantay kini nga magul-anon ang iyahang anak sa nangaging mga adlaw. Iyang nahibaw-an nga gibuwagan kini sa uyab sa milabay’ng adlaw. (BANAT NEWS)