Brgy. Labangon nagpa-drug test

CEBU, Philippines - Gipaubos sa drug test ang mga sakop ug opisyales sa Brgy. Labangon kagahapon, samtang walay nagpositibo sa 118 ka mga magtutudlo sa Don Carlos Gothong Memorial National High School nga gihimo niadtong adlaw nga Lunes.

Miapil sa nagpa-drug test sa Labangon ang mismong hepe sa Punta Princesa Police Station nga si Senior Inspector Percival Miasco agi og pagpakita sa iyang suporta kontra ilegal nga drugas ug aron dasigon ang ubang polis nga seryosuhon ang kampanya batok niini.

Ang drug test nga gihimo sa City Office on Substance Abuse Prevention (COSAP) sa 74 ka mga kawani sa barangay. Gibutyag hinuon ni Kapitan Victor Buendia kadto lamang anaa kanunay sa gawas sama sa garbage, maintenance, disaster ug tanod ang gipaubos sa drug test ug gusto usab niyang mapamatud-ang way tiggamitan kanila og drugas.

Sumala pa ni Buendia, gusto usa niyang limpyohan ang kaugalingon niyang tugkaran ug sugdan niya kini una sa iyang mga sakop. Si Dr. Alice Utlang, hepe sa COSAP nagkanayon nga karong adlawa moguwa ang resulta sa drug test.

Sa laing bahin, 118 ka mga magtutudlo ug non teaching personnel  sa Don Carlos A. Gothong Memorial National High School ang negatibo sa ilegal nga drugas matud pa ni Utlang.

Apan dili pa gihapon madeklarar nga drug free workplace ang maong tunghaan  kay dunay siyam nga wala pa nakaapil tungod kay dunay gitambongang seminars,  absent ug duna say nangikyas g’yud og tuyo  dihang gipatawag. (BANAT NEWS)